Fiðrildaveiðar 2014

24. október 2014 kl.08:23

Náttúrustofa Suðurlands í samstarfi við Náttúrufræðistofnun Íslands, Sæheima og Surtseyjarstofu, var með ljósagildru til fiðrildaveiða í Stórhöfða í sumar fimmta árið í röð. Að þessu sinni var gildran sett upp 7. maí en ekki 16. apríl. Þetta var gert þar sem að á síðustu fjórum árum hafði ekki veiðst fiðrildi í gildruna í Stórhöfða fyrr en í júní. Í ár veiddist svo fyrsta fiðrildið í víkunni sem hófst 11. júní. Veiðum var svo hætt 27. september en þá hafði ljósaperan brotnað. Á síðustu fjórum árum hafa aðeins 4 fiðrildi veiðst eftir 27. september svo ákveðið var að endurnýja ekki ljósaperuna þetta árið.
 
Brandygla (Euxoa ochrogaster).
 
 
 

Farið var með veiði sumarsins á Náttúrufræðistofnun Íslands þar sem Erling Ólafsson greindi fiðrildin til tegunda. Brandygla (Euxoa ochrogaster) var algengasta tegundin í ár (20 stk) en aðrar tegundir í afla eftir magni voru grasvefari (Eana osseana, 16 stk), jarðygla (Diarsia mendica, 5stk), Scropipalpa samadensis, 3 stk, túnfeti (Xanthorhoe decoloraria), 2 stk og svo eitt eintak af  hrossyglu (Apamea exulis), grasyglu (Cerapteryx graminis) og kálmöl (Plutella xylostella). Þetta gerir átta tegundir en tuttugu tegundir fiðrilda hafa veiðst í Stórhöfða frá því gildran var sett upp. Myndirnar eru teknar af pödduvef Náttúrufræðistofnunar Íslands og er áhugasömum bent á að upplýsingar um flest þau fiðrildi sem veiddust í Stórhöfða er að finna þar, sjá hér.
 
Túnfeti (Xanthorhoe decoloraria).