Fuglaskráningar - eBird

10. maí 2013 kl.13:03

Starfsmenn Náttúrustofu Suðurlands og fleiri hafa á síðustu tveimur árum skráð nokkuð reglulega hvaða fuglategundir þeir sjá á ferðum sínum í Vestmannaeyjum. Nú vantar helst talningar yfir hásumarið. Þó að þetta séu ekki hávísindalegar talningar gefa þær engu að síður góðar vísbendingar um það hvaða fuglategundir eru á ferðinni á hverjum tíma.
 
Bjartmáfur sést aðallega við Eyjar yfir veturinn á meðan fýllin sést allt árið.

Nokkrar tegundir sjást hér allt árið; það er æðarfugl, fýll, súla, tildra, sendlingur, silfurmáfur, hvítmáfur, svartbakur, teista, húsdúfa, hrafn, stari og snjótittlingur. Aðrar tegundir sjást hér helst yfir veturinn, t.d. straumönd, toppönd, dílskarfur, toppskarfur, hettumáfur, bjartmáfur, músarindill, svartþröstur og skógarþröstur. Hægt er að skoða gögnin á eBird fyrir Vestmannaeyjar hér, gögn fyrir allt Ísland hér og önnur gögn á www.ebird.org.
 
Músarindill sést aðeins á Heimaey á veturna, frá síðari hluta september fram í miðjan apríl.
 
Krákönd er sjaldgæfur flækingur á Íslandi og hefur sést nokkrum sinnum við Heimaey. Þessi ungi steggur sást utan við Eiðið í apríl og sá sami, eða annar á sama aldri, sást á sama stað í janúar.