Sunnanáttin síðasta laugardag bar með sér nokkuð af flækingum til Eyja auk farfugla. A.m.k. sex landsvölur og ein bæjasvala sáust við höfnina og af farfuglum sáust bæði sandlóa og þúfutittlingur í fyrsta sinn í ár.
Landsvala (Hirundo rustica) í Vestmannaeyjum 9. apríl 2011.
Lóum, tjöldum og tildrum fjölgaði mikið um helgina og stór hópur af hettumáfum var við golfvöllinn. Einnig sáust tvær stokkendur bæði við Klauf og í Vestmannaeyjahöfn í gær en þær sjást hér helst á vorin eða haustin.
Landsvölurnar voru viljugar fyrirsætur. Þær lifa á skordýrum og þar sem ekki er mikið af þeim á ferðinni þessa stundina er ekki víst að svölurnar verði langlífar.